Meðalhiti í maí hefur verið einni til fjórum gráðum lægri en síðastliðinn áratug og kuldi á landinu öllu hefur sjaldan verið jafn mikill á þessum árstíma. Það hefur áhrif á ýmsar greinar landbúnaðar, meðal annars sauðfjárræktun.

„Jú jú, vissulega er þetta kalt, það er líka búið að vera svo lengi kalt,“ segir Þórarinn Ingi Pétursson, formaður Landssamtaka sauðfjárbænda. „Þetta hefur verið allur maí og frá því í enda apríl er búinn að vera skítakuldi. Þannig að túnin eru orðin græn og svona en það gerist bara andskotinn ekki neitt og snjór í öllum fjöllum og ekkert farið að gróa.“

Á Ströndum snjóaði í gær og Þórarinn hefur verið í sambandi við bændur um allt land. „Ég heyrði í þeim í Húnavatnssýslum og menn voru nú svona að verða frekar pirraðir á þessu.“

Bændur hafa því þurft að hugsa meira en oftast áður um það fé sem er komið út , fylgjast þarf betur með veikburða lömbum og koma þeim fljótt inn í hlýjuna.

„Maður er svona oft á morgnana, þá fer maður hér um og sérstaklega eftir einhverja rigningatíð eða snjó og er þá að fara heim með það sem er orðið kalt, hitar það upp og setur svo aftur út,“ segir Þórarinn.

Hann vill þó ekki spá fyrir um fallþunga í haust, en á síðasta ári var hann óvenju mikill. Kuldinn gæti haft áhrif á afkomu sauðfjárbænda. „Það er nú full snemmt að spá um það, en miðað við hvernig þetta horfir núna þá myndi ég telja að það ætti að koma niður á fallþunganum. Það er mín tilfinning.“