Spáð er mjög slæmu veðri á norðan- og austanverðu landinu um komandi helgi. Samkvæmt spá Veðurstofunnar gengur vindur í norðan og norðvestanátt á föstudaginn kemur með mikilli úrkomu, rigningu á láglendi en slyddu eða snjókomu þegar komið er í 150 til 250 metra hæð yfir sjávarmál. Vindhraði verður á bilinu 15-23 m/s. Þá kólnar mjög skarpt og búast má við að hiti fari niður undir frostmark norðanlands. Aðfaranótt laugardags og á laugardagsmorgun bætir enn í vind og úrkoma verður áfram mikil með rigningu í byggð en slyddu eða snjókomu til fjalla. Þegar líður á daginn á hins vegar að draga bæði úr vindi og úrkomu. Rétt er að benda á að um langtímaspá er að ræða og getur hún breyst þegar nær dregur helgi.

Svipar til óveðursins í fyrra

Hrafn Guðmundsson veðurfræðingur hjá Veðurstofu Íslands segir að útlitið sé svart eins og spáin er núna. „Ef að spár ganga eftir sjáum við fram á mjög svipað óveður og gekk yfir sama svæði í fyrra, á svipuðum tíma. Það eru þó enn fjórir dagar í þetta og veðurhorfur geta breyst. Við höfum haft samband við Almannavarnir og erum í samráði við þá. Í fyrramáli kemur ný veðurspá og þá sjáum við hver staða mála verður. Það er samt rétt að árétta að ef spáin gengur eftir verður þetta aftakaveður, mikil úrkoma. Það kólnar skarpt seinnipart föstudags en gengur smám saman niður seinnipart laugardags. Eins og staðan er núna sýnist mér að það ætti að verða komið svona skaplegt veður á laugardagskvöld. Ég vil samt árétta að þessi spá getur breyst og vonandi breytist hún til batnaðar.“

Almannavarnir í viðbragðsstöðu

Guðrún Jóhannesdóttir hjá Almannavarnardeild Ríkislögreglustjóra segir að hjá embættinu fylgist menn vel með veðurspá og hafi haft samband við sitt fólk á norður- og austurlandi. „Við höfum haft samband við okkar fólk og gert þeim grein fyrir stöðu mála. Við höfum rætt við lögreglustjóra á þessum svæðum og þeir munu stýra aðgerðum á svæðunum, ef til þeirra kemur. Fólk í almannavarnardeildum mun koma saman og taka stöðuna. Við munum svo fylgjast með stöðu mála.“

Sigurður Eyþórsson framkvæmdastjóri Landssamtaka sauðfjárbænda hvetur bændur eindregið til að fylgjast vel með veðurspá og vera tilbúnir til að bregðast við ef illviðri skellur á um helgina.