Við stofnun Ráðgjafarmiðstöðvar landbúnaðarins ehf. (RML) um síðustu áramót varð sú breyting að skráning á öllum skýrsluhaldsgögnum fluttist frá Bændasamtökunum til RML. Í kjölfar þessa hefur verið ákveðið að gera nokkrar breytingar á vinnuferlum varðandi skráningar fjárbóka og vinnslu kynbótamat.
Þegar reglugerð um búfjármerkingar var sett árið 2005 (nú reglugerð 916/2012) voru merkingar sauðfjár víða í ólagi. Ekki voru samræmdar kröfur til sauðfjármerkja, gæði þeirra voru í sumum tilvikum óásættanleg og víða þurftu bændur að leggja út í mikinn kostnað við að merkja jafnvel alla hjörðina að nýju.
Til að flýta fyrir þeirri þróun, bæta rekjanleika, gæði skýrsluhaldsgagna (og þar með ræktunarstarfið) og ýta undir hraðari innleiðingu gæðastýrðrar sauðfjárframleiðslu hafa þessi merkjakaup verið styrkt með fjármunum úr sauðfjársamningi um nokkurra ára skeið. Fyrst skv. afgreiðslu framkvæmdanefndar búvörusamninga en af fagfé frá 2008. Bændasamtökin hafa séð um framkvæmd og umsýslu verkefnisins.
Stjórn Landssamtaka sauðfjárbænda beindi því til fagráðs í sauðfjárrækt haustið 2012 að taka þetta verkefni til skoðunar. Fagráðið fjallaði um málið á fundi í apríl og aftur í lok maí sl. Mat ráðsins var að hætta bæri þessum styrkveitingum, enda sé framangreindu innleiðingarskeiði nú að fullu lokið.
Þessi tillaga var samþykkt í stjórn Bændasamtakanna 19. júní sl. Það hefur því verið staðfest að kaup á ásetningsmerkjum nú í haust verða ekki styrkt.
